Канон ксении петербургской

• 
• Припе́в: Свята́я блаже́нная ма́ти на́ша Ксе́ние, моли́ Бо́га о на́с!
• Глас 8.

Канон Ксении Петербургской

1. Пе́снь 1.
2. Ирмо́с: Во́ду проше́д я́ко су́шу, и еги́петскаго зла́ избежа́в изра́ильтянин вопия́ше: Изба́вителю и Бо́гу на́шему пои́м.

3. Водо́ю креще́ния омы́вшися, перворо́днаго греха́ изба́вилась еси́, ма́ти Ксе́ние, и на́ша сердца́ слеза́ми покая́ния очи́сти, просвеще́ние подаю́щи почита́ющым святу́ю па́мять твою́.

4. В воде́ креще́ния зми́я лука́ва потопи́вшая, житие́м твои́м страда́льческим вра́жию си́лу умертви́ла еси́, блаже́нная, от нея́же и на́м изба́витися Спа́са умоли́.
5. Сла́ва: Во́ду живу́ю неистощи́мых даро́в подаде́ тебе́ Христо́с, блаже́нная ма́ти, Его́же нищету́ во́льно возлюби́ла еси́.

6. И ны́не: Во́ды покая́ния пода́ждь ми́, Пречи́стая, и, очи́стивши мя́ от нечистоты́ грехо́вныя, чи́ста предста́ви, Богороди́тельнице, Сы́ну Твоему́ и Бо́гу.
7. Пе́снь 3.

8. Ирмо́с: Небе́снаго кру́га Верхотво́рче, Го́споди, и Це́ркве Зижди́телю, ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

9. Небе́снаго кру́га Зижди́телю все́ житие́ свое́ отда́вши, возлюби́ла еси́ до конца́, сподо́би и на́с моли́твами твои́ми, блаже́нная, люби́ти Го́спода до конца́ дни́й на́ших.
10. Небе́сныя жи́зни жела́я, в житии́ твое́м вся́ земна́я пренебрегла́ еси́, сподо́би и на́с, ма́ти Ксе́ние, моли́твами твои́ми Небе́сныя жи́зни дости́гнути.
11. Сла́ва: Небе́снаго черто́га жела́ющи, стра́нническое житие́ прешла́ еси́, и ны́не со все́ми святы́ми в Небе́сных черто́зех лику́еши.

И ны́не: Небе́снаго Творца́, Богоро́дице всепе́тая, ро́ждши, Небе́с простра́ннейшая яви́лася еси́. На́с от простра́ннаго пути́ поги́бельнаго укло́ньше, на Небе́сный пу́ть наста́ви, мо́лимся.

Седа́лен, гла́с 5­-й:

Я́ко стра́нница во гра́де свята́го Петра́ яви́лася еси́, благоволе́нием Бо́жиим укрепля́ема, ма́ти прему́драя, Боже́ственных даро́в и чуде́с удосто́ившаяся. Те́мже, иму́ще дерзнове́ние ко Христу́ Бо́гу, ми́р испроси́ душа́м на́шым и ве́лию ми́лость.

• Пе́снь 4.
• Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
• Услы́шавши, Ксе́ние, я́ко Небеса́ пове́дают сла́ву Бо́жию, отве́ргла еси́ суету́ мирску́ю и в по́двизе поста́ и лише́ния на земли́ Бо́га сла́вити возжеле́ла еси́, Его́же сла́вити и на́с сподо́би.
• Услы́шавши и уразуме́вши дела́ Госпо́дня, просла́вила еси́ Его́ Божество́, наде́ждою и любо́вию к Нему́ украси́вши ду́шу твою́, по́двигами благоче́стия просвети́лася еси́, блаже́нная, Бо́жиею си́лою укрепля́емая.
• Сла́ва: Услы́шавши преще́ния вра́жеския и вся́кия ко́зни от ни́х терпя́щи, непоколеби́ма пребыла́ еси́, и на́с непоколеби́мых в доброде́телех утверди́.
• И ны́не: Услы́ши, Пречи́стая Влады́чице, моле́ния на́ша, и изба́ви на́с от наси́лия вра́жия, и гла́с Христо́в, призыва́ющий благослове́нныя в Ца́рство, услы́шати сподо́би.
• Пе́снь 5.
• Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
• Просвеща́хуся ве́рнии лю́дие, зря́ще незло́бие и кро́тость твою́, ма́ти Ксе́ние, помози́ и на́м, блаже́нная, подража́ти твоему́ незло́бию.
• Просвети́вши стезю́ жи́зни твоея́ све́том Богоразу́мия, Христа́ Го́спода вседу́шне возлюби́ла еси́, сподо́би и ны́, блаже́нная Ксе́ние, в се́м бы́ти тебе́ подража́тели.
• Сла́ва: Просвети́ на́с, о ма́ти Ксе́ние, наде́ждою и любо́вию ко Го́споду, ны́не бо зря́щи Христа́ лице́м к лицу́, све́та неизрече́ннаго наслажда́ешися, Тому́ за ны́ моли́ся.
• И ны́не: Просвети́ла еси́ омраче́нное естество́, Богоро́дице, Све́т И́стинный ро́ждши, те́мже и на́с све́том просвети́вши, от мра́чных вра́г свободи́.
• Пе́снь 6.
• Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися и молю́ся, я́ко Ио́на: от тли́, Бо́же, возведи́ мя.
• Моли́тву, я́ко исто́чник приснотеку́щий, ны́не излива́еши, неду́жныя исцеля́ющи, кре́пость и си́лу стра́ждущым подаю́щи, сподо́би и на́с моли́твами твои́ми изба́витися от вся́ких лю́тых.
• Моли́твою небе́сною и по кончи́не твое́й от неду́г свобожда́еши, цели́тельнице безме́здная, досто́йно хвали́ма еси́ на земли́, моли́ся о душа́х на́ших.
• Сла́ва: Моли́тву на́шу приими́, ма́ти Ксе́ние, да в честны́й хра́м тво́й прии́дем со тща́нием, и неду́гов душе́вных и страсте́й теле́сных исцеле́ние ско́ро прии́мем.
• И ны́не: Моли́твою Твое́ю Всемо́щною, Пречи́стая, изба́ви на́с от вра́г ви́димых и неви́димых, от грехо́в и вся́кия му́ки, я́ко ро́ждшая Человеколю́бца Бо́га.
• Конда́к, гла́с 3­-й:
• Дне́сь све́тло лику́ет гра́д свята́го Петра́, я́ко мно́жество скорбя́щих обрета́ют утеше́ние, на твоя́ моли́твы наде́ющеся, Ксе́ние всеблаже́нная, ты́ бо еси́ гра́ду сему́ похвало́ и утвержде́ние.
• И́кос:

Ка́ко возмогу́, гре́шный а́з, скве́рный душе́ю и те́лом, пове́дати е́же во пло́ти равноа́нгельное житие́ твое́ и пресла́вная чудеса́? А́ще у́бо мно́зи прему́дрии не дерза́ют испове́дати мно́гаго твоего́ терпе́ния и смире́ния и те́плыя ко Христу́ любве́, но оба́че наде́яся на твое́ заступле́ние, о блаже́нная, вопию́ ти: Ра́дуйся, я́ко везде́ призыва́ющих тя́ ско́ро предваря́еши, ра́дуйся, я́ко мно́жество скорбя́щих обрета́ют тобо́ю утеше́ние, ра́дуйся, свята́я блаже́нная Ксе́ниа, гра́ду сему́ похвало́ и утвержде́ние.

1. Пе́снь 7.
2. Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.
3. О́троки евре́йския А́нгел от огня́ неопа́льны сохрани́ и тебе́, Ксе́ние, в стра́нничестем житии́ укрепи́, пою́щу: благослове́н еси́, Го́споди Бо́же, во ве́ки.
4. Де́тем ева́нгльски подража́ла еси́ в житии́ твое́м, стезю́ те́сную проше́дши в незло́бии, те́мже и на́с на по́двиг доброде́тели сия́ укрепи́, пою́щих: благослове́н еси́, Го́споди Бо́же, во ве́ки.
5. Сла́ва: Отроко́м в пещи́ халде́йстей подража́ющи, Ксе́ние, воспева́ла еси́ Христа́, да́вшаго ти́ кре́пость, те́мже и мы́, чту́ще тя́, блаже́нная, со дерзнове́нием зове́м: Благослове́н еси́, Го́споди Бо́же, во ве́ки.
6. И ны́не: Отрокови́це Де́во, простри́ на на́с ми́лость Сы́на Твоего́, да кроме́шныя тьмы́ изба́вимся мольба́ми Твои́ми, пою́ще: благослове́н еси́, Го́споди Бо́же, во ве́ки.
7. Пе́снь 8.
8. Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те вся́ дела́ Госпо́дня Го́спода.
9. Победи́тельница страсте́й яви́лася еси́, Ксе́ние, лю́тая искуше́ния вра́жия побежда́ющи и непреста́нно пою́щи: благослови́те вся́ дела́ Госпо́дня Го́спода.
10. Побежда́ющи вся́кия стра́сти грехо́вныя, ты́, блаже́нная, я́ко све́тла звезда́ яви́лася еси́, приво́диши бо же́ны, па́дшия во грехи́, во е́же целому́дренно жи́ти и в покая́нии воспева́ти: благослови́те вся́ дела́ Госпо́дня Го́спода.

Сла́ва: Победи́тельница греха́ яви́лася еси́, блаже́нная ма́ти, благода́ть Вы́шняго иму́щи. Те́мже Небе́сная дости́гла еси́, иде́же ны́не со А́нгелы пое́ши: Благослови́те вся́ дела́ Госпо́дня Го́спода.

• И ны́не: Побе́де во бра́нех духо́вных ве́рным посо́бствуеши, Пресвята́я Де́во, те́мже и лю́дем гра́да на́шего по́мощь Твою́ низпосли́, да Тя́ вы́ну пое́м: Благослови́те вся́ дела́ Госпо́дня Го́спода.
• Пе́снь 9.
• Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
• Вои́стинну ра́зум Христо́в име́ла еси́, Ксе́ние, смире́ние, кро́тость, ве́ру несумне́нну, наде́жду и любо́вь, я́же к Бо́гу, и на́с сподо́би, да с тобо́ю Христа́ при́сно велича́ем.
• Вои́стинну на тебе́, Ксе́ние блаже́нная, испо́лнися Христо́во прорече́ние: претерпе́вый до конца́, то́й спасе́н бу́дет, ны́не бо со все́ми спасе́нными Христа́ при́сно велича́еши.
• Сла́ва: Вои́стинну никто́же, притека́яй к тебе́, блаже́нная ма́ти, то́щь благода́ти Бо́жия отхо́дит, ея́же и на́с испо́лни, да тя́ велича́ем.
• И ны́не: Вои́стинну Богоро́дицу Тя́, Де́во и Ма́ти Сло́ва, Хода́таицу су́щую на́м, Со́лнце Пра́вды возсия́вшую, ве́рнии, единому́дренно пе́сньми велича́ем.
• Свети́лен:
• Я́коже со́лнце светоно́сно, возсия́ ны́не, блаже́нная ма́ти, па́мять твоя́, вся́ ве́рныя веселя́щи, и́же моли́твенно взыва́ют ти́: моли́ся приле́жно спасти́ся на́м.
• Моли́тва:

О свята́я всеблаже́нная ма́ти на́ша Ксе́ниа! Оби́ды, поноше́ния и насме́шки Христа́ ра́ди претерпе́вшая, и за му́жа твоего́, без христиа́нскаго напу́тствия сконча́вшагося, непреста́нно моли́вшаяся.

Ви́ждь тесноту́ души́ моея́ и ско́рбь о уме́рших без покая́ния и причаще́ния Святы́х Та́ин сро́дниках и зна́емых мои́х (имена), и умоли́ да́нною тебе́ благода́тию Человеколюби́ваго Влады́ку Христа́ Бо́га на́шего, да прости́т и́м вся́ согреше́ния во́льная и нево́льная, из глуби́н а́довых да изведе́т и́х, от муче́ний лю́тых изба́вит и мно́жеством милосе́рдия Своего́ ко избра́нным Свои́м сопричте́т и́х, иде́же ты́ ны́не в незаходи́мей сия́еши сла́ве, воспева́я премилосе́рдаго Творца́ во ве́ки веко́в. Ами́нь.

Источник: https://KseniyaPeterburgskaya.ru/kanon

Канон святой блаженной Ксении Петербургской

• Пѣ́снь а҃.
• І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
• Водо́ю кр҃ще́нїѧ ѡ҆мы́вшисѧ, перворо́днагѡ грѣха̀ и҆зба́вилась є҆сѝ, ма́ти ѯе́нїе, и҆ на̑ша сердца̀ слеза́ми покаѧ́нїѧ ѡ҆чи́сти, просвѣще́нїе подаю́щи почита́ющымъ ст҃ꙋ́ю па́мѧть твою̀.
• Въ водѣ̀ кр҃ще́нїѧ ѕмі́ѧ лꙋка́ва потопи́вшаѧ, житїе́мъ твои́мъ страда́льческимъ вра́жїю си́лꙋ ᲂу҆мертви́ла є҆сѝ, бл҃же́ннаѧ, ѿ неѧ́же и҆ на́мъ и҆зба́витисѧ сп҃са ᲂу҆молѝ.
• Сла́ва: Во́дꙋ живꙋ́ю неистощи́мыхъ дарѡ́въ подадѐ тебѣ̀ хрⷭ҇то́съ, бл҃же́ннаѧ ма́ти, є҆гѡ́же нищетꙋ̀ во́льнѡ возлюби́ла є҆сѝ.
• И҆ ны́нѣ: Во́ды покаѧ́нїѧ пода́ждь мѝ, пречⷭ҇таѧ, и҆, ѡ҆чи́стивши мѧ̀ ѿ нечистоты̀ грѣхо́вныѧ, чи́ста предста́ви, бг҃ороди́тельнице, сн҃ꙋ твоемꙋ̀ и҆ бг҃ꙋ.
• Пѣ́снь г҃.
• І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
• Нбⷭ҇нагѡ крꙋ́га зижди́телю всѐ житїѐ своѐ ѿда́вши, возлюби́ла є҆сѝ до конца̀, сподо́би и҆ на́съ моли́твами твои́ми, бл҃же́ннаѧ, люби́ти гдⷭ҇а до конца̀ дні́й на́шихъ.
• Нбⷭ҇ныѧ жи́зни жела́ѧ, въ житїѝ твое́мъ всѧ̑ зємна́ѧ пренебрегла̀ є҆сѝ, сподо́би и҆ на́съ, ма́ти ѯе́нїе, моли́твами твои́ми нбⷭ҇ныѧ жи́зни дости́гнꙋти.
• Сла́ва: Нбⷭ҇наго черто́га жела́ющи, стра́нническое житїѐ прешла̀ є҆сѝ, и҆ ны́нѣ со всѣ́ми ст҃ы́ми въ нбⷭ҇ныхъ черто́зѣхъ ликꙋ́еши.

И҆ ны́нѣ: Нбⷭ҇наго творца̀, бцⷣе всепѣ́таѧ, ро́ждши, небе́съ простра́ннѣйшаѧ ꙗ҆ви́ласѧ є҆сѝ. На́съ ѿ простра́ннагѡ пꙋтѝ поги́бельнагѡ ᲂу҆кло́ньше, на нбⷭ҇ный пꙋ́ть наста́ви, мо́лимсѧ.

Сѣда́ленъ, гла́съ є҃­-й:

Ꙗ҆́кѡ стра́нница во гра́дѣ ст҃а́гѡ петра̀ ꙗ҆ви́ласѧ є҆сѝ, бл҃говоле́нїемъ бж҃їимъ ᲂу҆крѣплѧ́ема, ма́ти премꙋ́драѧ, бж҃е́ственныхъ дарѡ́въ и҆ чꙋде́съ ᲂу҆досто́ившаѧсѧ. Тѣ́мже, и҆мꙋ́ще дерзнове́нїе ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ и҆ ве́лїю ми́лость.

1. Пѣ́снь д҃.
2. І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑ и҆ просла́вихъ твоѐ бж҃ество̀.
3. Оу҆слы́шавши, ѯе́нїе, ꙗ҆́кѡ нб҃са̀ повѣ́даютъ сла́вꙋ бж҃їю, ѿве́ргла є҆сѝ сꙋетꙋ̀ мїрскꙋ́ю и҆ въ по́двизѣ поста̀ и҆ лише́нїѧ на землѝ бг҃а сла́вити возжелѣ́ла є҆сѝ, є҆го́же сла́вити и҆ на́съ сподо́би.
4. Оу҆слы́шавши и҆ ᲂу҆разꙋмѣ́вши дѣла̀ гдⷭ҇нѧ, просла́вила є҆сѝ є҆гѡ̀ бж҃ество̀, наде́ждою и҆ любо́вїю къ немꙋ̀ ᲂу҆краси́вши дꙋ́шꙋ твою̀, по́двигами бл҃гоче́стїѧ просвѣти́ласѧ є҆сѝ, бл҃же́ннаѧ, бж҃їею си́лою ᲂу҆крѣплѧ́емаѧ.
5. Сла́ва: Оу҆слы́шавши прещє́нїѧ вра́жєскїѧ и҆ всѧ̑кїѧ кѡ́зни ѿ ни́хъ терпѧ́щи, непоколеби́ма пребыла̀ є҆сѝ, и҆ на́съ непоколеби́мыхъ въ добродѣ́телехъ ᲂу҆твердѝ.
6. И҆ ны́нѣ: Оу҆слы́ши, пречⷭ҇таѧ влⷣчце, молє́нїѧ на̑ша, и҆ и҆зба́ви на́съ ѿ наси́лїѧ вра́жїѧ, и҆ гла́съ хрⷭ҇то́въ, призыва́ющїй бл҃гословє́нныѧ въ црⷭ҇тво, ᲂу҆слы́шати сподо́би.
7. Пѣ́снь є҃.
8. І҆рмо́съ: Просвѣтѝ на́съ повелѣ́нїи твои́ми, гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.
9. Просвѣща́хꙋсѧ вѣ́рнїи лю́дїе, зрѧ́ще неѕло́бїе и҆ кро́тость твою̀, ма́ти ѯе́нїе, помозѝ и҆ на́мъ, бл҃же́ннаѧ, подража́ти твоемꙋ̀ неѕло́бїю.
10. Просвѣти́вши стезю̀ жи́зни твоеѧ̀ свѣ́томъ бг҃оразꙋ́мїѧ, хрⷭ҇та̀ гдⷭ҇а вседꙋ́шнѣ возлюби́ла є҆сѝ, сподо́би и҆ ны̀, бл҃же́ннаѧ ѯе́нїе, въ се́мъ бы́ти тебѣ̀ подража́тели.
11. Сла́ва: Просвѣтѝ на́съ, ѽ ма́ти ѯе́нїе, наде́ждою и҆ любо́вїю ко гдⷭ҇ꙋ, ны́нѣ бо зрѧ́щи хрⷭ҇та̀ лице́мъ къ лицꙋ̀, свѣ́та неизрече́ннагѡ наслажда́ешисѧ, томꙋ̀ за ны̀ моли́сѧ.
12. И҆ ны́нѣ: Просвѣти́ла є҆сѝ ѡ҆мраче́нное є҆стество̀, бцⷣе, свѣ́тъ и҆́стинный ро́ждши, тѣ́мже и҆ на́съ свѣ́томъ просвѣти́вши, ѿ мра́чныхъ вра̑гъ свободѝ.
13. Пѣ́снь ѕ҃.
14. І҆рмо́съ: Моли́твꙋ пролїю̀ ко гдⷭ҇ꙋ и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ и҆ живо́тъ мо́й а҆́дꙋ прибли́жисѧ и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
15. Моли́твꙋ, ꙗ҆́кѡ и҆сто́чникъ приснотекꙋ́щїй, ны́нѣ и҆злива́еши, недꙋ̑жныѧ и҆сцѣлѧ́ющи, крѣ́пость и҆ си́лꙋ стра́ждꙋщымъ подаю́щи, сподо́би и҆ на́съ моли́твами твои́ми и҆зба́витисѧ ѿ всѧ́кихъ лю́тыхъ.
16. Моли́твою нбⷭ҇ною и҆ по кончи́нѣ твое́й ѿ недꙋ̑гъ свобожда́еши, цѣли́тельнице безме́зднаѧ, досто́йнѡ хвали́ма є҆сѝ на землѝ, моли́сѧ ѡ҆ дꙋша́хъ на́шихъ.
17. Сла́ва: Моли́твꙋ на́шꙋ прїимѝ, ма́ти ѯе́нїе, да въ честны́й хра́мъ тво́й прїи́демъ со тща́нїемъ, и҆ недꙋ́гѡвъ дꙋше́вныхъ и҆ страсте́й тѣле́сныхъ и҆сцѣле́нїе ско́рѡ прїи́мемъ.
18. И҆ ны́нѣ: Моли́твою твое́ю всемо́щною, пречⷭ҇таѧ, и҆зба́ви на́съ ѿ вра̑гъ ви́димыхъ и҆ неви́димыхъ, ѿ грѣхѡ́въ и҆ всѧ́кїѧ мꙋ́ки, ꙗ҆́кѡ ро́ждшаѧ чл҃вѣколю́бца бг҃а.
19. Конда́къ, гла́съ г҃­-й:
20. Дне́сь свѣ́тлѡ ликꙋ́етъ гра́дъ ст҃а́гѡ петра̀, ꙗ҆́кѡ мно́жество скорбѧ́щихъ ѡ҆брѣта́ютъ ᲂу҆тѣше́нїе, на твоѧ̑ моли̑твы надѣ́ющесѧ, ѯе́нїе всебл҃же́ннаѧ, ты́ бо є҆сѝ гра́дꙋ семꙋ̀ похвало̀ и҆ ᲂу҆твержде́нїе.
21. І҆́косъ:
22. Ка́кѡ возмогꙋ̀, грѣ́шный а҆́зъ, скве́рный дꙋше́ю и҆ тѣ́лѡмъ, повѣ́дати є҆́же во пло́ти равноа́гг҃льное житїѐ твоѐ и҆ пресла̑внаѧ чꙋдеса̀; а҆́ще ᲂу҆́бѡ мно́зи премꙋ́дрїи не дерза́ютъ и҆сповѣ́дати мно́гагѡ твоегѡ̀ терпѣ́нїѧ и҆ смире́нїѧ и҆ те́плыѧ ко хрⷭ҇тꙋ̀ любвѐ, но ѻ҆ба́че надѣ́ѧсѧ на твоѐ застꙋпле́нїе, ѽ бл҃же́ннаѧ, вопїю́ ти: ра́дꙋйсѧ, ꙗ҆́кѡ вездѣ̀ призыва́ющихъ тѧ̀ ско́рѡ предварѧ́еши, ра́дꙋйсѧ, ꙗ҆́кѡ мно́жество скорбѧ́щихъ ѡ҆брѣта́ютъ тобо́ю ᲂу҆тѣше́нїе, ра́дꙋйсѧ, ст҃а́ѧ бл҃же́ннаѧ ѯе́нїа, гра́дꙋ семꙋ̀ похвало̀ и҆ ᲂу҆твержде́нїе.
23. Пѣ́снь з҃.
24. І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
25. Ѻ҆́троки є҆врє́йскїѧ а҆́гг҃лъ ѿ ѻ҆гнѧ̀ неѡпа́льны сохранѝ и҆ тебѐ, ѯе́нїе, въ стра́нничестѣмъ житїѝ ᲂу҆крѣпѝ, пою́щꙋ: бл҃гослове́нъ є҆сѝ, гдⷭ҇и бж҃е, во вѣ́ки.
26. Дѣ́темъ є҆ѵⷢ҇льски подража́ла є҆сѝ въ житїѝ твое́мъ, стезю̀ тѣ́снꙋю проше́дши въ неѕло́бїи, тѣ́мже и҆ на́съ на по́двигъ добродѣ́тели сїѧ̀ ᲂу҆крѣпѝ, пою́щихъ: бл҃гослове́нъ є҆сѝ, гдⷭ҇и бж҃е, во вѣ́ки.
27. Сла́ва: Ѻ҆трокѡ́мъ въ пещѝ халде́йстѣй подража́ющи, ѯе́нїе, воспѣва́ла є҆сѝ хрⷭ҇та̀, да́вшаго тѝ крѣ́пость, тѣ́мже и҆ мы̀, чтꙋ́ще тѧ̀, бл҃же́ннаѧ, со дерзнове́нїемъ зове́мъ: бл҃гослове́нъ є҆сѝ, гдⷭ҇и бж҃е, во вѣ́ки.
28. И҆ ны́нѣ: Ѻ҆трокови́це дв҃о, прострѝ на на́съ млⷭ҇ть сн҃а твоегѡ̀, да кромѣ́шныѧ тьмы̀ и҆зба́вимсѧ мольба́ми твои́ми, пою́ще: бл҃гослове́нъ є҆сѝ, гдⷭ҇и бж҃е, во вѣ́ки.
29. Пѣ́снь и҃.
30. І҆рмо́съ: Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои́мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а.
31. Побѣди́тельница страсте́й ꙗ҆ви́ласѧ є҆сѝ, ѯе́нїе, лю̑таѧ и҆скꙋшє́нїѧ вра̑жїѧ побѣжда́ющи и҆ непреста́ннѡ пою́щи: бл҃гослови́те всѧ̑ дѣла̀ гдⷭ҇нѧ гдⷭ҇а.
32. Побѣжда́ющи всѧ̑кїѧ стра̑сти грѣхѡ́вныѧ, ты̀, бл҃же́ннаѧ, ꙗ҆́кѡ свѣ́тла ѕвѣзда̀ ꙗ҆ви́ласѧ є҆сѝ, приво́диши бо жены̑, па̑дшїѧ во грѣхѝ, во є҆́же цѣломꙋ́дреннѡ жи́ти и҆ въ покаѧ́нїи воспѣва́ти: бл҃гослови́те всѧ̑ дѣла̀ гдⷭ҇нѧ гдⷭ҇а.

Сла́ва: Побѣди́тельница грѣха̀ ꙗ҆ви́ласѧ є҆сѝ, бл҃же́ннаѧ ма́ти, бл҃года́ть вы́шнѧго и҆мꙋ́щи. Тѣ́мже нбⷭ҇наѧ дости́гла є҆сѝ, и҆дѣ́же ны́нѣ со а҆́гг҃лы пое́ши: бл҃гослови́те всѧ̑ дѣла̀ гдⷭ҇нѧ гдⷭ҇а.

• И҆ ны́нѣ: Побѣ́дѣ во бра́нехъ дꙋхѡ́вныхъ вѣ̑рнымъ посо́бствꙋеши, прест҃а́ѧ дв҃о, тѣ́мже и҆ лю́демъ гра́да на́шегѡ по́мощь твою̀ низпослѝ, да тѧ̀ вы́нꙋ пое́мъ: бл҃гослови́те всѧ̑ дѣла̀ гдⷭ҇нѧ гдⷭ҇а.
• Пѣ́снь ѳ҃.
• І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.
• Вои́стиннꙋ ра́зꙋмъ хрⷭ҇то́въ и҆мѣ́ла є҆сѝ, ѯе́нїе, смире́нїе, кро́тость, вѣ́рꙋ несꙋмнѣ́ннꙋ, наде́ждꙋ и҆ любо́вь, ꙗ҆̀же къ бг҃ꙋ, и҆ на́съ сподо́би, да съ тобо́ю хрⷭ҇та̀ при́снѡ велича́емъ.
• Вои́стиннꙋ на тебѣ̀, ѯе́нїе бл҃же́ннаѧ, и҆спо́лнисѧ хрⷭ҇то́во прорече́нїе: претерпѣ́вый до конца̀, то́й сп҃се́нъ бꙋ́детъ, ны́нѣ бо со всѣ́ми сп҃се́нными хрⷭ҇та̀ при́снѡ велича́еши.
• Сла́ва: Вои́стиннꙋ никто́же, притека́ѧй къ тебѣ̀, бл҃же́ннаѧ ма́ти, то́щь бл҃года́ти бж҃їѧ ѿхо́дитъ, є҆ѧ́же и҆ на́съ и҆спо́лни, да тѧ̀ велича́емъ.
• И҆ ны́нѣ: Вои́стиннꙋ бцⷣꙋ тѧ̀, дв҃о и҆ мт҃и сло́ва, хода́таицꙋ сꙋ́щꙋю на́мъ, сл҃нце пра́вды возсїѧ́вшꙋю, вѣ́рнїи, є҆диномꙋ́дреннѡ пѣ́сньми велича́емъ.
• Свѣти́ленъ:
• Ꙗ҆́коже со́лнце свѣтоно́сно, возсїѧ̀ ны́нѣ, бл҃же́ннаѧ ма́ти, па́мѧть твоѧ̀, всѧ̑ вѣ̑рныѧ веселѧ́щи, и҆̀же моли́твеннѡ взыва́ютъ тѝ: моли́сѧ прилѣ́жнѡ сп҃сти́сѧ на́мъ.
• Моли́тва:

Ѽ ст҃а́ѧ всебл҃же́ннаѧ ма́ти на́ша ѯе́нїа! Ѡ҆би̑ды, поношє́нїѧ и҆ насмѣ̑шки хрⷭ҇та̀ ра́ди претерпѣ́вшаѧ, и҆ за мꙋ́жа твоегѡ̀, без̾ хрⷭ҇тїа́нскагѡ напꙋ́тствїѧ сконча́вшагосѧ, непреста́ннѡ моли́вшаѧсѧ.

Ви́ждь тѣснотꙋ̀ дꙋшѝ моеѧ̀ и҆ ско́рбь ѡ҆ ᲂу҆ме́ршихъ без̾ покаѧ́нїѧ и҆ причаще́нїѧ ст҃ы́хъ та́инъ сро́дникахъ и҆ зна́емыхъ мои́хъ (и҆́мⷬ҇къ), и҆ ᲂу҆молѝ да́нною тебѣ̀ бл҃года́тїю чл҃вѣколюби́ваго влⷣкꙋ хрⷭ҇та̀ бг҃а на́шегѡ, да прости́тъ и҆̀мъ всѧ̑ согрѣшє́нїѧ вѡ́льнаѧ и҆ невѡ́льнаѧ, и҆з̾ глꙋби́нъ а҆́довыхъ да и҆зведе́тъ и҆̀хъ, ѿ мꙋче́нїй лю́тыхъ и҆зба́витъ и҆ мно́жествомъ милосе́рдїѧ своегѡ̀ ко и҆збра̑ннымъ свои̑мъ сопричте́тъ и҆̀хъ, и҆дѣ́же ты̀ ны́нѣ въ незаходи́мѣй сїѧ́еши сла́вѣ, воспѣва́ѧ премилосе́рдаго творца̀ во вѣ́ки вѣкѡ́въ. А҆ми́нь.

Источник: https://www.akafistnik.ru/kanony-russkim-svyatym/kanon-svyatoj-blazhennoj-ksenii-peterburgskoj/

Блаженной Ксении Петербургской

Суеты́ земна́го ми́ра отве́ргшися, / кре́ст жития́ бездо́мнаго во стра́нничестве прия́ла еси́, / скорбе́й, лише́ний, людска́го осмея́ния не убоя́лася еси́, / любо́вь же Христо́ву позна́ла еси́, / е́юже ны́не на небеси́ услажда́ешися, / Ксе́ние блаже́нная, богому́драя, / моли́ся о спасе́нии ду́ш на́ших.

Ин тропа́рь, гла́с 7:

Нищету́ Христо́ву возлюби́вши,/ безсме́ртныя трапе́зы ны́не наслажда́ешися,/ безу́мием мни́мым безу́мие ми́ра обличи́вши,/ смире́нием кре́стным си́лу Бо́жию восприя́ла еси́./ Сего́ ра́ди дар чудоде́йственныя по́мощи стяжа́вшая,/ Ксе́ние блаже́нная, моли́ Христа́ Бо́га// изба́витися нам от вся́каго зла покая́нием.

Велича́ние:

Ублажа́ем тя́, свята́я блаже́нная Ксе́ние, и чти́м святу́ю па́мять твою́, ты́ бо мо́лиши о на́с Христа́ Бо́га на́шего.

Стихи́ра, гла́с 6:

Жесто́кое житие́ во́лею избра́ла еси́, и озлобле́ния вся́ческая претерпе́ла еси́, юро́дство ми́ра сего́ обличи́вши, прему́дрость же Бо́жию яви́вши. И ны́не на небеси́ утеша́ешися, мы́ же, на земли́ стра́нствующе, тебе́ непреста́нно зове́м: не забу́ди на́с, блаже́нная, Христа́ Бо́га о на́с умоля́ющи.

Кано́н блаже́нней Ксе́нии, гла́с 4-й

Пе́снь 1

• Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.
• Припев: Святая блаженная мати Ксение, моли Бога о нас.
• Ксе́ние блаже́нная, вои́стинну по и́мени твоему́ и житие́ твое́ бы́сть: на земли́ бо, я́ко во стране́ чужде́й, преходя́щи и во Оте́чествие небе́сное преста́витися ча́ющи, вся́ земна́я, я́ко се́нь и со́ние, презре́ла еси́.
• Суету́ вся́ческую, я́ко пра́х от ногу́ твое́ю отря́сши, жесто́ким путе́м в зе́млю обетова́ния ше́ствовати изво́лила еси́, Ксе́ние мужему́дренная, человекоуби́йцу врага́, я́ко Амали́ка, побежда́ющи и Го́сподеви побе́дное пе́ние принося́щи.
• Еги́петския котлы́ благоде́нствия презре́вши и миру кичли́вому посмея́вшися, Ксе́ние му́драя, мо́ря жите́йскаго дно́ прешла́ еси́ неврежде́нно, Бо́гу тя́ веду́щу руко́ю кре́пкою, Ему́же воспе́ла еси́ побе́дное пе́ние.
• Богородичен: Ненаде́ющихся наде́ждо и бори́мых по́моще, Пречи́стая, в мо́ри су́щих звездо́ боготе́чная, и в пусты́ни заблу́ждших исто́чниче живоно́сный, отра́ду душа́м на́шим, Де́во Благослове́нная, да́ждь.

Пе́снь 3

1. Ирмос: Не му́дростию, и си́лою, и бога́тством хва́лимся, но Тобо́ю, Отчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

2. Иоа́нна, возлю́бленнаго ученика́ Спа́сова, слы́шавши глаго́люща: и́же лю́бит ми́р, в не́м любви́ Отчей не́сть; мир грехолюби́вый возненави́девши, в до́м Отчий поспеша́ла еси́, блаже́нная.

3. Юро́ду себе́ Христа́ ра́ди сотво́рши, му́дрости же преми́рныя исполня́ющися, о́ком чи́стым бу́дущая, я́ко настоя́щая, прозрева́ющи, проро́ком Бо́жиим поревнова́ла еси́, Ксе́ние богому́драя.

4. Моли́тва усе́рдная — пи́ща тебе́ бы́сть, пра́веднице, руга́ния же и осмея́ния — питие́ сла́дкое, смиренному́дрие — оде́жда украше́ния, и вене́ц — Ду́ха осия́ние.
5. Богородичен: Уста́ двиза́ти на моли́тву, я́коже ма́ти Самуи́лова ника́коже облени́мся, ве́рнии, небесе́ и земли́ Цари́цу призыва́ющи.

Седа́лен, гла́с 5:

Егда́ но́щию моли́твы твоя́ тайноле́пно творя́щи, на сне́г коле́на твоя́ преклоня́ла еси́, блаже́нная, душа́ твоя́ па́че сне́га убеля́шеся, сле́зы же, от теплоты́ серде́чныя пролива́емыя, зе́млю согрева́ху, гра́д тво́й спя́щий бде́нием твои́м спаса́шеся, и гне́в Бо́жий от того́ отвраща́шеся.

Ны́не у́бо тебе́ от мира сего́ отше́дшей, бе́дствуем лю́те, но́щь несве́тла наста́ на́м, огусте́ тма́ грехо́вная, со́н ле́ности и нераде́ния зе́ницы на́ша смежи́, гра́д тво́й в ру́це безбо́жник предаде́ся, и оте́чествие твое́ врагу́ порабо́тися, потщи́ся у́бо на моли́тву и на по́мощь на́м поспеша́й, Ксе́ние, дерзнове́нием ве́лия.

Слава, и ныне, богородичен, глас тойже:

Предста́тельнице и ско́рая Засту́пнице ро́да христиа́нского, бездо́мных и оте́чествия лише́нных Покрови́тельнице, моли́ при́сно Сы́на Твоего́ и Бо́га с блаже́нною Ксе́ниею за ру́сския лю́ди во оте́чествии и в разсе́янии су́щия, да Оте́чествия неотъе́млемаго, небе́снаго дости́гнем.

Пе́снь 4

• Ирмос: Услы́шах сла́вное смотре́ние Твое́, Христе́ Бо́же, я́ко роди́лся еси́ от Де́вы, да от ле́сти изба́виши зову́щия: сла́ва си́ле Твое́й, Го́споди.
• Же́нскую не́мощь отлага́ющи, Андре́ем нарекла́ся еси́, мужеу́мная, проти́ву духо́в зло́бы подвиза́ющися, — сла́ва си́ле Твое́й, — к Подаю́щему ти́ си́лу взыва́ющи.
• Евино высокоу́мие, ра́й затвори́вшее, отве́ргши всеконе́чно, богому́драя, юро́да нарещи́ся изволя́еши, зми́я льсти́ваго посрами́вши.
• Ум Христо́в внутрьу́ду тая́щи, прему́драя, ми́ра му́дрость попира́еши, вразумля́еши же лю́ди, судьбы́ Бо́жия предвозвеща́ющи, и стопы́ на́ша на пу́ть пра́вый направля́ющи.
• Богородичен: Милосе́рдие Твое́ к на́м преклони́ти тщи́мся, Богоро́дице, моли́твенницу Тебе́ предлага́ющи Ксе́нию блаже́нную, ея́же предста́тельство стяжа́ти упова́ем, па́мять ея́ те́пле воспева́юще.

Пе́снь 5

1. Ирмос: Стяжа́вый ны́, избра́нныя лю́ди, кро́вию Твое́ю, Го́споди, Тво́й ми́р да́ждь на́м, во единомы́слии сохраня́я ста́до Твое́.
2. Наготу́ и хла́д терпя́щи, ри́зы же ни́щим раздаю́щи, — довле́ет ми́ ри́за креще́ния, — в себе́ взыва́ла еси́, блаже́нная.

3. Уврачу́й на́ша ра́ны, услы́ши моли́твы, умири́ на́шу жи́знь и на по́мощь на́м поспеша́й, Ксе́ние благолюби́вая.
4. Юныя вразуми́ и на пу́ть и́стины наста́ви, ста́рыя умудри́ и боже́ственная разуме́ти научи́, вся́ко на дела́ блага́я и́х подвиза́ющи, о Ксе́ние, му́дрость небе́сную стяжа́вшая.

5. Богородичен: Печа́ли отло́жше, восклони́мся и горе́ воззри́м, бра́тие, и у́зрим в небесе́х Цари́цу Богоро́дицу, покро́вом Свои́м светоно́сным на́с покрыва́ющую.

Пе́снь 6

Ирмос: Внегда́ скорбе́ти ми́, возопи́х ко Го́споду, и услы́ша мя́ Бо́г спасе́ния моего́.

Окорми́ на́с, в мо́ри жите́йском бе́дствующих, блаже́нная, ко приста́нищу благооти́шному на́с провожда́ющи, моля́щися ко Еди́ному, Иже на́с спасти́ могу́щему.

Хотя́ще блага́я твори́ти, зла́я содева́ем. За́поведи Бо́жия ве́дуще, о те́х небреже́м и согреша́ем: помози́ на́м немощны́м, Ксе́ние благосе́рдая.

Возопи́ о на́с ко Го́споду, Ему́же послужи́ла еси́, о Ксе́ние, гла́сом кре́пким, я́коже Моисе́й в пусты́ни, и услы́шит тя́ Бо́г, спасти́ хотя́й челове́ки.

Богородичен: Аще не ты́ на́м ру́це про́стреши, о Богома́ти, не и́мамы избы́ти поги́бельнаго ро́ва, сего́ ра́ди Ти́ зове́м: Влады́чице, спаси́ ны.

Конда́к, гла́с 3:

На земли́ я́ко стра́нна пребы́вши, / о небе́снем же Оте́чествии воздыха́ющи, / юро́да от бу́иих и неве́рных, / прему́дра же и свя́та от ве́рных познава́ешися, / и от Бо́га сла́вою и че́стию венча́ешися, / Ксе́ние мужеу́мная и богоу́мная, / сего́ ра́ди зове́м ти́: / ра́дуйся, я́ко по стра́нствии земне́м / в дому́ Отчем водворя́ешися.

Икос:

Кто́ сия́, во врата́ Ца́рствия небе́снаго толку́щая, ея́же ри́зы белы́, лице́ же сия́ет па́че со́лнца? Отку́ду прихо́дит и яковы́х тре́бует? — Сия́ е́сть дщи́ Отца́ Небе́снаго, Сы́на Бо́жия раба́ ве́рная и Ду́ха Свята́го сосу́д избра́нный, на земли́ я́ко стра́нница прише́льствовавшая. Ны́не во Оте́чествие небе́сное преставля́ется, со тща́нием у́бо се́й две́ри отве́рзите и срета́йте ю́, с весе́лием зову́ще: ра́дуйся, Ксе́ние, я́ко по стра́нствии земне́м в дому́ Отчем водворя́ешися.

Пе́снь 7

• Ирмос: Юноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.
• Ле́гкое бре́мя Христо́во на ра́мо твое́ взе́мши, вся́ тя́жкая земна́я ни во что́же вменя́ющи, блаже́нная, неудобоноси́мое ка́мение на ве́рх церко́вный преноси́ла еси́, усе́рдно трудя́щися и зову́щи: благослове́н еси́ Го́споди, Бо́же оте́ц на́ших.
• Алчем и жа́ждем и наготу́ем духо́вно: пи́щу сла́дкую, твое́ наставле́ние, да́ждь у́бо на́м, блаже́нная, прохлади́ горта́ни на́ша росо́ю моли́тв твои́х о на́с, убо́гих, я́ко да Го́сподеви благода́рне зове́м: благослове́н еси́, Бо́же оте́ц на́ших.
• Мытаре́во грехолю́бное житие́ подража́юще, смиренному́дрия того́ не стяжа́хом, па́че же и фарисе́евой го́рдости преда́хомся, доброде́телей же не иму́ще, что́ у́бо сотвори́м немощни́и, а́ще не к тебе́, Ксе́ние, прибе́гнем и возопии́м: умоли́ о на́с Бо́га оте́ц на́ших.
• Богородичен: Ины́я не́сть во вселе́нней, я́коже Ты́, Богоро́дице, я́же ма́тернее дерзнове́ние ко Спа́су иму́щая, и Ангелы пресла́вною чистото́ю превозше́дшая: те́мже Ти́ припа́даем, Влады́чице, моли́ о на́с при́сно Бо́га оте́ц на́ших.

Пе́снь 8

Ирмос: Вся́ческая, Влады́ко, прему́дростию Твое́ю соста́вил еси́, земли́ же па́ки утверди́л еси́, я́коже ве́си, дно́, основа́нием водрузи́вый на вода́х безме́рных. Те́м вси́ вопие́м, воспева́юще: благослови́те, дела́ Госпо́дня, непреста́нно Го́спода.

Помо́щница на́м бу́ди, блаже́нная, изыма́ющи на́с от скорбе́й и боле́зней, от собла́знов же, нестрое́ний и бе́д, и жела́ния серде́ц на́ших во бла́го испо́лни, я́ко да о тебе́ Бо́га благодаря́ще, вопие́м: благослови́те дела́ Госпо́дня непреста́нно Го́спода.

Огне́вицу держа́вствующему уста́вила еси́, цари́це же в виде́нии со́ннем предста́вши, прорекла́ еси́ то́й рожде́ние ча́да, те́мже благода́рственне вопия́ше: благослови́те дела́ Госпо́дня непреста́нно Го́спода.

Богородичен: Имя Твое́ пресла́дкое и мироуха́нное да не отхо́дит от у́ст на́ших, Богоро́дице, сердца́ же на́ша любо́вию боже́ственною горя́ща, всю́ тва́рь да приглаша́ют вопи́ти: благослови́те дела́ Госпо́дня непреста́нно Ма́терь Бо́жию.

Пе́снь 9

1. Ирмос: Тя́, пресла́вную Неве́сту и Всесвяту́ю Богоро́дицу, Зижди́теля ро́ждшую неви́димых же и все́х ви́димых, пе́сньми велича́ем.
2. Тайноле́пная жития́ твоего́ и по́двизи твои́ сокрове́ннии, ны́не ми́ру яви́шася, Ксе́ние блаже́нная, те́мже о тебе́ всеселя́щеся, Христа́ Бо́га, тебе́ просла́вльшаго, немо́лчно велича́ем.

3. Аще и преста́вилася еси́ от земны́х, оба́че ве́дуще тя́ и по сме́рти на́м спребыва́ющую и моли́твами твои́ми при́сно на́с от бе́д покрыва́ющу, благода́рне тя́, блаже́нная, велича́ем.

4. Еже о на́с, немощны́х и убо́гих, попече́ние твое́ воспомина́юще, с любо́вию к тебе́ припа́даем, моли́твеннице на́ша кре́пкая: не оста́ви у́бо на́с, си́рых, но при́сно на́м помога́й, я́ко да о тебе́ Бо́га и Отца́ Небе́снаго при́сно велича́ем.

5. Богородичен: Моли́твы Ксе́нии блаже́нныя к Тебе́, Влады́чице, о на́с приноси́мыя, к Сы́ну твоему́ и Бо́гу, Де́во, принеси́, Твои́м ма́терним хода́тайством ты́я подкрепля́ющи, и спаса́й, Пречи́стая, Тя́ велича́ющия.

Свети́лен:

• До́ме Отчий, отве́рзи ми́ две́ри, от земли́ чужде́й преста́вльшейся, — вопие́т Ксе́ния блаже́нная, во врата́ Ца́рствия небе́снаго толку́щи.
• Сла́ва, и ны́не, Богородичен:
• Две́ре небе́сная, пала́то Царе́ва, христиа́н неруши́мая стено́, богоприе́мнеи Твои́ ру́це на́м простира́ющи, введи́ на́с, Влады́чице, в ве́чныя кро́вы.

Молитва блаженной Ксении Петербургской

О свята́я блаже́нная ма́ти Ксе́ние! Под кро́вом Всевы́шняго жи́вшая, ведо́мая и укрепля́емая Богома́терию, глад и жа́жду, хлад и зной, поноше́ния и гоне́ния претерпе́вшая, дар прозо́рливости и чудотворе́ния от Бо́га получи́вшая и под се́нью Всемогу́щего упоко́ившаяся, днесь же, от сла́внаго тысящеле́тия Креще́ния Руси́, Це́рковь Ру́сская, прославля́ет тя, я́ко благоуха́нный цвет. Предстоя́ще на ме́сте твоего́ погребе́ния, пред о́бразом твои́м святы́м, я́ко живе́й ти, су́щей с на́ми, мо́лимся ти: приими́ проше́ния на́ша и принеси́ я́ ко Престо́лу милосе́рднаго Отца́ Небе́снаго, я́ко дерзнове́ние к Нему́ иму́щая; испроси́ притека́ющим к тебе́ ве́чное спасе́ние, на блага́я дела́ и начина́ния на́ша ще́дрое благослове́ние, от вся́ких бед и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о нас, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том свята́го Креще́ния озари́ти и печа́тию да́ра Ду́ха Свята́го запечатле́ти, ю́ныя в ве́ре, че́стности, богобоя́зненности и целому́дрии воспита́ти и успе́хи в уче́нии им стяжа́ти. Боля́щия и неду́гующия исцели́, супру́гом любо́вь и согла́сие ниспосли́, мона́шествующих по́двигом до́брым подвиза́тися помози́ и от поноше́ния огради́, па́стыри в кре́пости ду́ха утверди́, Це́рковь и страну́ на́шу сохрани́, и всех боголюби́вых чад в предсме́ртный час причаще́ния Святы́х Христо́вых Та́ин сподо́би, ты бо еси́ на́ше ско́рое услы́шание и избавле́ние, тебе́ благодаре́ние воссыла́ем и с тобо́ю сла́вим Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Молитва вторая блаженной Ксении Петербургской

О, пресла́вная свята́я блаже́нная ма́ти на́ша Ксе́ние, те́плая о нас пред Бо́гом моли́твеннице! Я́коже пре́жде к надгро́бию твоему́ припа́давшии, си́це ны́не и мы по прославле́нии твое́м к моще́м твои́м прибега́юще, про́сим: помоли́ся Го́споду, да освяти́т на́ши ду́ши и телеса́, да просвети́т ум, очи́стит со́весть от вся́кия скве́рны, нечи́стых помысло́в, лука́вых и ху́льных умышле́ний и от вся́каго превозноше́ния, го́рдости же и киче́ния, высокоу́мия же и де́рзости, от вся́каго фарисе́йскаго лицеме́рия, и от вся́каго сту́днаго и лука́ваго обы́чия на́шего; да да́рует нам и́скреннее покая́ние, сокруше́ние серде́ц на́ших, смиренному́дрие, кро́тость же и ти́хость, благогове́ние, ра́зум же духо́вный со вся́ким благоразу́мием и благодаре́нием. Утаи́вшая себе́ от му́дрых ве́ка сего́, но Бо́гу зна́емая, испроси́ же стране́ на́шей Росси́йстей от бед лю́тых избавле́ние, всего́ на́шего жития́ обновле́ние и исправле́ние, соблюди́ нас во вся́ком благочести́вом правосла́вном испове́дании ве́ры христиа́нския, я́ко да ублажа́юще тя сподо́бимся во вся дни воспева́ти, благодари́ти и сла́вити Отца́ и Сы́на и Свята́го Ду́ха, Тро́ицу Единосу́щную, Животворя́щую и Неразде́льную во ве́ки веко́в. Ами́нь.

Молитва третья блаженной Ксении Петербургской

О, свята́я уго́дница Бо́жия блаже́нная Ксе́ния! При́зри ми́лостиво твои́м о́ком на нас, раб Бо́жиих (имена), честно́й твое́й ико́не уми́льно моля́щиеся и прося́щие у тебе́ по́мощи и заступле́ния.

Простри́ ко Го́споду Бо́гу на́шему те́плыя твоя́ моли́твы и испроси́ душа́м на́шим оставле́ние прегреше́ний.

Се бо мы се́рдцем сокруше́нным, и ду́хом смире́нным тебе́ хода́таицу ми́лостивую ко Влады́це и моли́твенницу за ны, гре́шныя, призыва́ем, я́ко ты прия́ла еси́ от Него́ благода́ть моли́тися за ны и от бед избавля́ти.

Тебе́ у́бо про́сим, не пре́зри нас недосто́йных, моля́щихся тебе́ и твое́й по́мощи тре́бующих, и исходата́йствуй всем вся ко спасе́нию поле́зная, я́ко да твои́ми ко Го́споду Бо́гу моли́твами получи́вши благода́ть и ми́лость просла́вим всех благи́х Исто́чника и Даропода́теля и Бо́га Еди́наго, в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Источник: https://xn—-7sbahbba0chrecjllhdbcuymu3s.xn--p1ai/kanon/minea_fevral/kan_6fevr_ksenii.html

Канон святой блаженной Ксении Петербургской — Святцы

Воду прошед яко сушу, и египетскаго зла избежав израильтянин вопияше: Избавителю и Богу нашему поим.

Водою крещения омывшися, первороднаго греха избавилась еси, мати Ксение, и наша сердца слезами покаяния очисти, просвещение подающи почитающым святую память твою.

• В воде крещения змия лукава потопившая, житием твоим страдальческим вражию силу умертвила еси, блаженная, от неяже и нам избавитися Спаса умоли.
• Слава: Воду живую неистощимых даров подаде тебе Христос, блаженная мати, Егоже нищету вольно возлюбила еси.
• И ныне: Воды покаяния подаждь ми, Пречистая, и, очистивши мя от нечистоты греховныя, чиста представи, Богородительнице, Сыну Твоему и Богу.

Песнь 3

Ирмос:

Небеснаго круга Верхотворче, Господи, и Церкве Зиждителю, ты мене утверди в любви Твоей, желаний краю, верных утверждение, Едине Человеколюбче.

1. Небеснаго круга Зиждителю все житие свое отдавши, возлюбила еси до конца, сподоби и нас молитвами твоими, блаженная, любити Господа до конца дний наших.

2. Небесныя жизни желая, в житии твоем вся земная пренебрегла еси, сподоби и нас, мати Ксение, молитвами твоими Небесныя жизни достигнути.
3. Слава: Небеснаго чертога желающи, странническое житие прешла еси, и ныне со всеми святыми в Небесных чертозех ликуеши.

И ныне: Небеснаго Творца, Богородице всепетая, рождши, Небес пространнейшая явилася еси. Нас от пространнаго пути погибельнаго уклоньше, на Небесный путь настави, молимся.

Седален, глас 5­-й:

Яко странница во граде святаго Петра явилася еси, благоволением Божиим укрепляема, мати премудрая, Божественных даров и чудес удостоившаяся. Темже, имуще дерзновение ко Христу Богу, мир испроси душам нашым и велию милость.

Песнь 4

Ирмос:

Услышах, Господи, смотрения Твоего таинство, разумех дела Твоя и прославих Твое Божество.

• Услышавши, Ксение, яко Небеса поведают славу Божию, отвергла еси суету мирскую и в подвизе поста и лишения на земли Бога славити возжелела еси, Егоже славити и нас сподоби.
• Услышавши и уразумевши дела Господня, прославила еси Его Божество, надеждою и любовию к Нему украсивши душу твою, подвигами благочестия просветилася еси, блаженная, Божиею силою укрепляемая.
• Слава: Услышавши прещения вражеския и всякия козни от них терпящи, непоколебима пребыла еси, и нас непоколебимых в добродетелех утверди.

И ныне: Услыши, Пречистая Владычице, моления наша, и избави нас от насилия вражия, и глас Христов, призывающий благословенныя в Царство, услышати сподоби.

Песнь 5

Ирмос:

Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Просвещахуся вернии людие, зряще незлобие и кротость твою, мати Ксение, помози и нам, блаженная, подражати твоему незлобию.

1. Просветивши стезю жизни твоея светом Богоразумия, Христа Господа вседушне возлюбила еси, сподоби и ны, блаженная Ксение, в сем быти тебе подражатели.
2. Слава: Просвети нас, о мати Ксение, надеждою и любовию ко Господу, ныне бо зрящи Христа лицем к лицу, света неизреченнаго наслаждаешися, Тому за ны молися.
3. И ныне: Просветила еси омраченное естество, Богородице, Свет Истинный рождши, темже и нас светом просветивши, от мрачных враг свободи.

Песнь 6

Ирмос:

Молитву пролию ко Господу и Тому возвещу печали моя, яко зол душа моя исполнися и живот мой аду приближися и молюся, яко Иона: от тли, Боже, возведи мя.

• Молитву, яко источник приснотекущий, ныне изливаеши, недужныя исцеляющи, крепость и силу страждущым подающи, сподоби и нас молитвами твоими избавитися от всяких лютых.
• Молитвою небесною и по кончине твоей от недуг свобождаеши, целительнице безмездная, достойно хвалима еси на земли, молися о душах наших.
• Слава: Молитву нашу приими, мати Ксение, да в честный храм твой приидем со тщанием, и недугов душевных и страстей телесных исцеление скоро приимем.

И ныне: Молитвою Твоею Всемощною, Пречистая, избави нас от враг видимых и невидимых, от грехов и всякия муки, яко рождшая Человеколюбца Бога.

Кондак, глас 3­-й:

Днесь светло ликует град святаго Петра, яко множество скорбящих обретают утешение, на твоя молитвы надеющеся, Ксение всеблаженная, ты бо еси граду сему похвало и утверждение.

Икос:

Како возмогу, грешный аз, скверный душею и телом, поведати еже во плоти равноангельное житие твое и преславная чудеса? Аще убо мнози премудрии не дерзают исповедати многаго твоего терпения и смирения и теплыя ко Христу любве, но обаче надеяся на твое заступление, о блаженная, вопию ти: Радуйся, яко везде призывающих тя скоро предваряеши, радуйся, яко множество скорбящих обретают тобою утешение, радуйся, святая блаженная Ксениа, граду сему похвало и утверждение.

Песнь 7

Ирмос:

Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Отроки еврейския Ангел от огня неопальны сохрани и тебе, Ксение, в странничестем житии укрепи, поющу: благословен еси, Господи Боже, во веки.

1. Детем евангльски подражала еси в житии твоем, стезю тесную прошедши в незлобии, темже и нас на подвиг добродетели сия укрепи, поющих: благословен еси, Господи Боже, во веки.
2. Слава: Отроком в пещи халдейстей подражающи, Ксение, воспевала еси Христа, давшаго ти крепость, темже и мы, чтуще тя, блаженная, со дерзновением зовем: Благословен еси, Господи Боже, во веки.
3. И ныне: Отроковице Дево, простри на нас милость Сына Твоего, да кромешныя тьмы избавимся мольбами Твоими, поюще: благословен еси, Господи Боже, во веки.

Песнь 8

Ирмос:

Победители мучителя и пламене благодатию Твоею бывше, заповедем Твоим зело прилежаще, отроцы вопияху: благословите вся дела Господня Господа.

Победительница страстей явилася еси, Ксение, лютая искушения вражия побеждающи и непрестанно поющи: благословите вся дела Господня Господа.

Побеждающи всякия страсти греховныя, ты, блаженная, яко светла звезда явилася еси, приводиши бо жены, падшия во грехи, во еже целомудренно жити и в покаянии воспевати: благословите вся дела Господня Господа.

Слава: Победительница греха явилася еси, блаженная мати, благодать Вышняго имущи. Темже Небесная достигла еси, идеже ныне со Ангелы поеши: Благословите вся дела Господня Господа.

И ныне: Победе во бранех духовных верным пособствуеши, Пресвятая Дево, темже и людем града нашего помощь Твою низпосли, да Тя выну поем: Благословите вся дела Господня Господа.

Песнь 9

Ирмос:

Воистинну Богородицу Тя исповедуем, спасеннии Тобою, Дево Чистая, с безплотными лики Тя величающе.

• Воистинну разум Христов имела еси, Ксение, смирение, кротость, веру несумненну, надежду и любовь, яже к Богу, и нас сподоби, да с тобою Христа присно величаем.
• Воистинну на тебе, Ксение блаженная, исполнися Христово проречение: претерпевый до конца, той спасен будет, ныне бо со всеми спасенными Христа присно величаеши.
• Слава: Воистинну никтоже, притекаяй к тебе, блаженная мати, тощь благодати Божия отходит, еяже и нас исполни, да тя величаем.
• И ныне: Воистинну Богородицу Тя, Дево и Мати Слова, Ходатаицу сущую нам, Солнце Правды возсиявшую, вернии, единомудренно песньми величаем.

Светилен:

Якоже солнце светоносно, возсия ныне, блаженная мати, память твоя, вся верныя веселящи, иже молитвенно взывают ти: молися прилежно спастися нам.

Молитва:

О святая всеблаженная мати наша Ксениа! Обиды, поношения и насмешки Христа ради претерпевшая, и за мужа твоего, без христианскаго напутствия скончавшагося, непрестанно молившаяся.

Виждь тесноту души моея и скорбь о умерших без покаяния и причащения Святых Таин сродниках и знаемых моих (имена), и умоли данною тебе благодатию Человеколюбиваго Владыку Христа Бога нашего, да простит им вся согрешения вольная и невольная, из глубин адовых да изведет их, от мучений лютых избавит и множеством милосердия Своего ко избранным Своим сопричтет их, идеже ты ныне в незаходимей сияеши славе, воспевая премилосердаго Творца во веки веков. Аминь.

Источник: https://svyatsy.org/akafisty-i-kanony/kanony-russkim-svyatym/kanon_svyatoy_blazhennoy_ksenii_peterburgskoy/

Канон Преподобной Ксении Миласской

Оглавление:

Пе́снь 1

• Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.
• Припев: Святая преподобная Ксение, моли Бога о нас.
• Стра́ннаго су́ща вся́кия доброде́тели и удали́вшагося от Бо́га дея́ньми безме́стными, присво́й мя́ Сему́ моли́твами твои́ми благоприя́тными, Ксе́ние честна́я, преподо́бная, твое́ стра́нное житие́ благохва́лящаго.
• Огнь тя́ разжже́ мы́сленный, я́ко ве́щь удобопа́льну, мирску́ю пре́лесть и плотска́го обру́чника отврещи́ся увеща́ ра́зумом му́жественнейшим и Го́споду чи́сте уневе́стися.
• Стра́нную уразуме́вши жи́знь, на небесе́х пребыва́ющую и непреходя́щую, зва́ние я́ко дея́ние премени́ла еси́ и потекла́ еси́, я́коже еле́нь жа́ждущий, Безсме́ртнаго в сле́д Обру́чника.
• Богородичен: Пе́сньми Всечи́стую, ве́рнии, Мари́ю да восхва́лим, Богома́терь обра́дованную, покро́в боже́ственный, благоти́шное приста́нище, все́х ве́рных спасе́ние.

Пе́снь 3

1. Ирмос: Утвержде́й Сло́вом небеса́ и зе́млю основа́вый на вода́х мно́гих, утверди́ мя к пе́нию славосло́вия Твоего́, Го́споди.
2. Удержа́ла еси́ раче́ние боже́ственное чи́стыя души́ твоея́, забве́ние прия́ти тя́ поще́ния боле́зней увеща́, честна́я, и естества́.

3. Безсме́ртнаго Обру́чника добро́тами наслажда́ема, добро́ту пло́ти увяди́ла еси́ и яви́лася еси́ красне́йша, в Боже́ственный черто́г всели́вшися.
4. Позлаще́нная кри́ла доброде́телей стяжа́вши, к высоте́ небе́сней возлете́ла еси́, блаже́нная, я́ко голуби́ца нетле́нна.

5. Богородичен: Све́тлый о́блаче мы́сленнаго и пресве́тлаго Со́лнца, возсия́вшаго из чре́ва Твоего́, Де́во, просвети́ ду́ши пою́щих Тя́.

Седа́лен, гла́с 8

За милосе́рдие я́вльшееся на земли́ возлюби́вши Сло́во Бо́га Отца́, Тому́ после́довала еси́, я́ко Жениху́, всеблаже́нная, и тле́ннаго жениха́ усе́рдно оста́вила еси́, оста́вльши же тле́нное бога́тство.

Те́мже, во стра́нстве тезоимени́тно живу́щи, стра́сти умертви́ла еси́ и живы́х восприя́ла еси́ насле́дие, богодухнове́нная.

Моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости.

КрестоБогородичен:

Агнца, и Па́стыря, и Изба́вителя Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегреше́ний оставле́ние ве́рою пою́щим Боже́ственныя Стра́сти Твоя́.

Пе́снь 4

• Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.
• Ве́но Христу́ принесла́ еси́ чистоту́, умерщвле́ние уде́с и боле́зни воздержа́ния, и восприя́ла еси́ небе́сное Ца́рство и ве́чнующее наслажде́ние.
• Образ тебе́ до́брым подаю́щи, привлекла́ еси́ мно́гая ду́ши на спасе́ние, отто́ргшися мирска́го пристра́стия, Ксе́ние богому́драя и досточу́дная.
• Моча́щи посте́лю слеза́ми, преподо́бная, и с пе́пелом яду́щи хле́б, утеше́ние получи́ла еси́ нестаре́ющееся и рая́ наслажде́ние.
• Богородичен: Ра́дуйся, от на́с, Свята́я Богоро́дице; ра́дуйся, Ра́дость ро́ждшая ми́ру; ра́дуйся, еди́на защище́ние челове́ков, Благослове́нная Богоро́дице Чи́стая.

Пе́снь 5

Ирмос: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Яко ю́ница, жела́ющи Па́стыря Боже́ственную добро́ту, взыва́ла еси́: где́ ны́не пасе́ши, Женише́? Где́ почива́еши, рцы́ ми? Жела́ю Твое́ ви́дети преизя́щное виде́ние и распаля́юся всю́ду.

1. Рачи́тельныя добро́ты Моея́, — вопие́т Жени́х, — и́щущи, честна́я, доброде́тельми облиста́вшися, в небесе́х Мя́ смотри́: та́мо пасу́ Аз и Моя́ призыва́ю всегда́ о́вцы.
2. Го́рлица красне́йшая, ла́стовица светле́йшая и мы́сленный слави́й, ловле́ния прете́кши мы́сленных се́тей, яви́лася еси́, Ксе́ние честна́я, и в пожела́нней добро́те Христо́ве, досточу́дная.
3. Богородичен: Безма́терня горе́, в после́дняя су́щим до́ле, ражда́еши без отца́, Осуществова́вшаго, Де́во, на́ше все́ за благоутро́бие мно́гое, Его́же моли́ спасти́ от тли́ пою́щия Тя́.

Пе́снь 6

• Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
• Стра́нное твое́ житие́ и па́че челове́ка поще́ние прославля́я, тебе́ ра́ди Стра́нствовавый, сла́вная, зна́меньми и чудесы́ пресла́вными и́стинно тя́, преподо́бная, украси́.
• Кру́гом доброде́телей венча́вшися, востекла́ еси́, к Нему́же жела́ла еси́, Христу́, кру́гом зве́здным тя́ па́че ума́ возвеща́ющу бли́жним и да́льным страннообра́зно, Ксе́ние сла́вная.
• Устрани́вшагося дале́че от за́поведей Бо́га на́шего, присво́й мя́ твои́ми, преподо́бная, мольба́ми и стра́нна мя́ сотвори́ лю́тыя гее́нны и страсте́й, содержа́щих мя́.
• Богородичен: На ра́мех херуви́мских неопи́санно Седя́й, опи́сан в Твое́м чре́ве всели́ся пло́тию, а не Божество́м, и из Тебе́ про́йде Спаса́яй челове́чество.

Конда́к, гла́с 2

Твою́ страннонра́вную, Ксе́ние, па́мять соверша́юще, любо́вию почита́ющии тя́, пое́м Христа́, во все́х тебе́ подаю́щаго кре́пость исцеле́ний, Ему́же всегда́ моли́ся о все́х на́с.

Пе́снь 7

1. Ирмос: Отроки ороси́вый в пещи́ и Де́ву сохрани́вый, ро́ждшую Тя́, по рождестве́, благослове́н еси́, Бо́же оте́ц на́ших.
2. Пелена́ми Ри́м хва́лится, Ми́ласса же мно́жае, твоя́ мо́щи стяжа́вши, из ни́хже то́чатся чудеса́ ве́рным, богоневе́сто.

3. Река́ яви́лася еси́ врачева́ний, страсте́й мо́ре потопля́я песнопою́щих: благослове́н еси́, Го́споди, Бо́же оте́ц на́ших.
4. Успи́ла еси́ стра́сти душетле́нныя во мно́гих бде́ниих, блаже́нная, и пра́ведным подо́бным сно́м усну́ла еси́, о ми́ре моля́щися.

5. Богородичен: Из Тебе́ Воплоти́вшагося па́че сло́ва моля́щи не преста́й, Препе́тая Богоро́дице, от се́тей изба́вится вра́жиих душа́м на́шим.

Пе́снь 8

• Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.
• Обручи́вшися, я́ко писа́ся, еди́ному му́жу, Христу́, кра́сному добро́тою, вся́к ви́д доброде́телей благоче́стно навы́кла еси́, сла́вная, и в черто́г Боже́ственный всели́ся, ве́но прии́мши благода́ть врачева́ний во вся́ ве́ки.
• Душа́ моя́ в сле́д Тебе́ прилепи́ся, Христе́, — вопия́ла еси́ любо́вию, — я́ко земля́ жа́ждущая, Тя́, во́ду жи́ву, ищу́, Го́споди, Тебе́ ту́чи приноша́ю сле́з, Твоея́ любве́ струе́ю напо́й мя́, Спа́се, во вся́ ве́ки.
• Украси́лася еси́, возлю́бльши и́стинно Су́щее Жела́ние, просла́вилася еси́, отрокови́це, Препросла́вленному прилепи́вшися Бо́гу, ты́ ли́к святы́й привела́ еси́ де́в Спа́су, тя́ подража́вших, с ни́миже в го́рних лику́еши селе́ниих.
• Богородичен: Еди́ну Тя́ избра́, добро́ту Иа́ковлю, Отчее Сло́во, и посреде́ Тебе́ всели́ся, и, я́ко благоволи́, па́че все́х кра́сный челове́ков, Всечи́стая, про́йде, омрачи́вшееся на́ше очища́я естество́.

Пе́снь 9

1. Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

2. Не́мощию, сла́вная, некре́пкаго врага́ победи́ла еси́, стра́нну проходя́щи жи́знь и стра́сти плотски́я умертви́вши, и ны́не на небесе́х живе́ши, иде́же твое́ и́маши и́стинно жи́тельство, я́ко чи́стая де́ва.

3. Благослове́н Госпо́дь, приста́нище ти́хое врачева́ний показа́в честну́ю твою́ ра́ку, на́м, при́сно бе́дствующим пучи́ною и бу́рею страсте́й, мона́шествующих сла́во и де́в похвало́, богоно́сная Ксе́ние.

4. Яко де́вства хра́м, я́ко чи́стую голуби́цу, я́ко го́рлицу непоро́чную, я́ко неве́сту Христо́ву, кра́сную добро́тою тя́ и непоро́чную, я́ко о́браз Боже́ственных доброде́телей, я́ко ве́рт заключе́н, ве́рнии, почита́ем, богоно́сная Ксе́ние.
5. Богородичен: Глаго́лом Твои́м после́дующе, ро́ди родо́в, Блаже́нная, Тя́ ублажа́ют при́сно: Бо́га бо, и́стинно Блаже́ннаго, родила́ еси́, Чи́стая Де́во, вся́ блаже́нны Тому́ рабо́тающия нело́жно творя́щаго.

Тропарь преподобной Ксении Миласской, глас 8

В тебе́, ма́ти, изве́стно спасе́ся е́же по о́бразу:/ прии́мши бо крест, после́довала еси́ Христу́,/ и, де́ющи учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бная Ксе́ние, дух твой.

Кондак преподобной Ксении Миласской, глас 2

Твою́ страннонра́вную, Ксе́ние, па́мять соверша́юще,/ любо́вию почита́ющии тя, пое́м Христа́,/ во всех тебе́ подаю́щаго кре́пость исцеле́ний,// Ему́же всегда́ моли́ся о всех нас.

Ин кондак преподобной Ксении Миласской, глас 4

И́же во святы́х свята́я/ Христа́ Преблага́го всем се́рдцем возлюби́ла еси́, Богому́драя Ксе́ние сла́вная,/ того́ ра́ди омерзи́ла еси́ мирску́ю сла́дость./ Крест же Его́ взе́мши честны́й,// возлюби́ пе́ти при́сно: аллилу́ия.

Сохранить канон в социальных сетях:

Источник: https://pravoslavnye-molitvy.ru/kanon-ksenii-milasskoj-rimlyanyne/